ရှမ်းမြောက်ရှိတရုတ်ရေနံနှင့်သဘ၀ဓာတ်ငွေ့ပိုက်လိုင်းတလျှောက် စစ်ကောင်စီ၏တိုက်ခိုက်မှုကြောင့် အရပ်သား ပြည်သူများစွာ သေဆုံးပြီး ပိုက်လိုင်းပေါက်ကွဲမည်ကို စိုးရိမ်မှုမြင့်တက်

ရှမ်းလူ့အခွင့်အရေးမဏ္ဍိုင်မှ နောက်ဆုံးရ လူ့အခွင့်အရေး ချိုးဖေါက်မှု ထုတ်ပြန်ချက်

2023 ခုနှစ် ဒီဇင်ဘာလ 21 ရက်

ရှမ်းမြောက်ရှိတရုတ်ရေနံနှင့်သဘ၀ဓာတ်ငွေ့ပိုက်လိုင်းတလျှောက် စစ်ကောင်စီ၏တိုက်ခိုက်မှုကြောင့် အရပ်သား ပြည်သူများစွာ သေဆုံးပြီး ပိုက်လိုင်းပေါက်ကွဲမည်ကို စိုးရိမ်မှုမြင့်တက်

၂၀၂၃ခုနှစ်၊ အောက်တိုဘာလ ၂၇ရက်နေ့တွင် မြောက်ပိုင်းညီနောင်မဟာမိတ်သုံးဖော် ဦးဆောင်သည့် ၁၀၂၇ စစ်ဆင်ရေးစတင်အပြီး ရှမ်းမြောက်ရှိတရုတ်ပိုင် ရေနံနှင့်သဘာဝဓာတ်ငွေ့ပိုက်လိုင်းတလျှောက်ရှိမြို့နယ်များကို စစ်ကောင်စီက လေကြောင်းမှလည်းကောင်း၊ ကုန်းကြောင်းမှလည်းကောင်း အဆင်အခြင်းမဲ့ တိုက်ခိုက်မှုများကြောင့် အရပ်သားပြည်သူ ၂၇ဦးသေဆုံးပြီး ၃၃ဦးဒဏ်ရာရကာ အဆောက်အဦး ၁၆၀ ကျော်ပျက်စီးဆုံးရှုံးခဲ့ရသည်။

၁၀၂၇ စစ်ဆင်ရေး၏ အဓိကပစ်မှတ်နေရာသည် တရုတ်နယ်စပ်တလျှောက်ရှိမြို့နယ်များဖြစ်ပြီး ဗမာပြည်အတွင်း ပိုက်လိုင်းဖြတ်သန်းသွားရာ နမ့်ခမ်းမြို့လည်း ပါဝင်သည်။ သို့ရာတွင် ညီနောင်မဟာမိတ်သုံးဖော်က စစ်ကောင်စီ၏ ထောက်ပို့များကို ဖြတ်တောက်ထားရာ ပိုက်လိုင်း၏တောင်ဖက်တလျှောက် ရှိမြို့နယ်များဖြစ်သည့် နောင်ချို၊ ကျောက်မဲ၊သီပေါမြို့နယ်အတွင်း မန္တလေး-မူဆယ် အဝေးပြေးလမ်းတလျှောက်တွင်လည်း တိုက်ပွဲများဖြစ်ပွားလျက်ရှိသည်။ အဆိုပါမြို့နယ်များအတွင်းဖြစ်ပွားနေသည့် တိုက်ပွဲများ၌ ပိုက်လိုင်းများအနီးတွင် စစ်ကောင်စီ၏ လေကြောင်းမှလည်းကောင်း၊ လက်နက်ကြီး ဖြင့်လည်းကောင်း အဆင်အခြင်းမဲ့တိုက်ခိုက်မှုများကြောင့် အန္တရာယ်ကြီးမားလွန်းသော ပိုက်လိုင်းပေါက်ကွဲမှုများဖြစ်ပေါ်လာမည်ကို စိုးရိမ်မှုများမြင့်တက်လျက်ရှိသည်။

လေကြောင်းတိုက်ခိုက်မှုများသည် အောက်တိုဘာလ ၂၉ရက်နေ့တွင် စစ်ကောင်စီက တအာင်းတပ်မတော် TNLA နှင့် မန္တလေး PDF များလှုပ်ရှား ရာ ဒေသဖြစ်သည့် နောင်ချိုမြို့အနောက်ဖက် ၆ကီလိုမီတာဝေးကွာသည့် ကျောက်ကြမ်း ရွာကို စစ်ကောင်စီက လေကြောင်းဖြင့် ဗုံးကြဲတိုက်ခိုက်သည့်အချိန်ကတည်းက စတင်ခဲ့သည်။ လေကြောင်းတိုက် ခိုက်မှုကြောင့် ဟိန္ဒူဘာသာရေးကျောင်းတစ်ကျောင်းပျက်စီးခဲ့ပြီး အရပ်သားပြည်သူတစ်ဦးသေဆုံးကာ နှစ်ဦးဒဏ်ရာရခဲ့သည်။ ကျောက်ကြမ်းရွာတောင်ဖက် မီတာ ၁၀၀ ပင်မဝေးသည့်နေရာတွင် ပိုက်လိုင်းတည်ရှိသည်။

နောက်ရက်အနည်းငယ်အကြာတွင် စစ်ကောင်စီက နောင်ချိုမြို့ အနောက်ဖက် အဝေးပြေးလမ်းရှိ ရွာများရှိ TNLA နှင့် PDF တပ်သား များကိုတိုက်ထုတ်ရန် လေကြောင်းတိုက်ခိုက်မှုများပြုလုပ်ခဲ့သည့်အတွက် နေအိမ် ၃၀ ကျော်ပျက်စီး ပြီး အရပ်သားပြည်သူ တစ်ဦးသေဆုံးကာ သုံးဦးဒဏ်ရာရခဲ့သည်။ လေကြောင်းမှ ဗုံးကြဲတိုက်ခိုက်ခံရသည့် ရွှေညောင်ပင်နှင့် အုမ်းမခါးကျေးရွာနှစ်ရွာသည် ပိုက်လိုင်းအနီးတွင် တည်ရှိသည်။

နိုဝင်ဘာလ ၆ရက်နေ့တွင် TNLA နှင့် PDF တပ်များသည် ကျောက်မဲမြို့နယ်ကို ဖြတ်သန်းသွားသည့် မန္တလေးမူဆယ် အဝေးပြေး လမ်းရှိ စစ်ကောင်စီ၏ ဂုတ်ထိပ်တံတားအစောင့်တပ်များကို တိုက်ခိုက်ခဲ့သည်။ ယင်းနောက် ရက်အနည်း ငယ်အကြာတွင် ဂုတ်ထိပ် တံတား အရှေ့ဖက် အဝေးပြေးလမ်းမရှိ ကျောက်မဲမြို့နယ်၊ နောင်ပင်ကျေးရွာအုပ်စုကို စစ်ကောင်စီက လေကြောင်းတိုက်ခိုက်မှုများ ပြုလုပ်ခဲ့သည့်အတွက် အရပ်သားပြည်သူ တစ်ဦးသေဆုံးပြီး ပိုက် လိုင်း အနီးရှိ ကျေးရွာလေးရွာမှ နေအိမ် ၂၀ကျော် ပျက်စီးခဲ့သည်။ ညနေ ၅နာရီအချိန်၌ စစ်ကောင်စီတပ်သား ၅၀ခန့်သည့် ပိုက်လိုင်း စခန်းသို့ရောက်ရှိလာပြီး ပိုက်လိုင်းစခန်းအ တွင်းမှပစ္စည်းများကိုလည်းကောင်း၊ အနီးရှိ ပန်တိန်ကျေးရွာအတွင်း နေအိမ် ၂၀ခန့်မှ ဆန်၊ ဆီနှင့် အခြား အိမ်အသုံး ဆောင်ပစ္စည်းများကို ခိုးယူသွားသည်။ စစ်ကောင်စီမီ ဒီယာများမှ ပိုက်လိုင်းစခန်း ခိုးယူခံရသည့် ဓာတ်ပုံများကို ဖော်ပြကာ အဆိုပါထိခိုက်ဆုံးရှုံးမှုများကို TNLA ကပြုလုပ်သည်ဟု စွပ်စွဲခဲ့သည်။

နိုဝင်ဘာလ နှောင်းပိုင်းတွင် တိုက်ပွဲများသည် အဝေးပြေးလမ်းမ အရှေ့ဖက် ကျောက်မဲမြို့နယ်မှ သီပေါမြို့နယ်အထိ ကူးစက်လာခဲ့ပြီး စစ်ကောင်စီက လက်နက်ကြီးများဖြင့် ပစ်ခတ်မှုကြောင့်သော်လည်းကောင်း၊ သီပေါမြို့အတွင်းနှင့် မြို့ပတ်ပတ်လည်ရှိ စစ်ကောင်စီတပ်သားများ၏ အဆင်အခြင်မဲ့ပစ်ခတ်မှုကြောင့်သော်လည်းကောင်း အရပ်သား ပြည် သူတစ်ဦးသေဆုံးခဲ့ပြီး ၈ဦးဒဏ်ရာရှိခဲ့သည်။ နိုဝင်ဘာလ ၂၇ရက်နေ့တွင် စစ်ကောင်စီက ကျောက်မဲမြို့ အရှေ့ဖက် မူဆယ်-မန္တလေးအဝေးပြေးလမ်းမပေါ်ရှိ ဗူးခါးရွာကို လေကြောင်းဗုံးကြဲတိုက်ခိုက်မှုများ ပြုလုပ်ခဲ့သဖြင့် အရပ်သားပြည်သူတစ်ဦး ထိခိုက်ဒဏ်ရာရရှိကာ နေအိမ်သုံးလုံးပျက်စီးခဲ့သည်။ ဗူးခါးရွာသည် ပိုက်လိုင်းမြောက်ဖက် မီတာ ၅၀၀ သာဝေးကွာသည့်နေရာတွင် တည်ရှိသည်။

ဒီဇင်ဘာလမှစ၌ နမ့်ခမ်းမြို့တောင်ဖက်စွန်းတွင်အခြေစိုက်သည့် စစ်ကောင်စီတပ်ရင်းကို TNLA ၏တိုက်ခိုက်မှုမှ ကာကွယ်ရန် စစ်ကောင်စီသည် နမ့်ခမ်းမြို့အတွင်းနှင့် မြို့ပတ်ပတ်လည်ကို လက်နက်ကြီးများဖြင့်သော်လည်းကောင်း၊ လေကြောင်းမှသော်လည်းကောင်း ဗုံးကြဲတိုက်ခိုက်မှုများပြုလုပ်ခဲ့သည်။ ဒီဇင်ဘာလ ၁၆ရက်နေ့အထိ  အဆိုပါတိုက်ခိုက်မှုများကြောင့် အရပ်သားပြည်သူသေဆုံးမှု ၁၆ ဦးအထိရှိခဲ့ပြီး ထိခိုက်ဒဏ်ရာရရှိသူ ၁၂ဦးရှိကာ နေအိမ်အလုံး ၁၀၀ ကျော် ပျက်စီးခဲ့ပြီဖြစ်သည်။ ဒီဇင်ဘာလ ၁၆ရက်နေ့ ညအတွင်းမှာပင် နမ့်ခမ်းမြို့အနောက်တောင်ဖက် ၁၀ကီလိုမီတာဝေးကွာသည့်ဟိုနားကျေးရွာကို စစ်ကောင်စီက လေကြောင်းဖြင့် တိုက်ခိုက်ခဲ့သဖြင့် အရပ်သားပြည်သူ ၅ဦးသေဆုံးခဲ့ပြီး လေးဦးဒဏ်ရာရခဲ့သည်။ ပိုက်လိုင်းသည် ဟိုနားကျေးရွာသည် ဘေးကပ်ရပ်တွင် ဖြတ်သန်းသွားပြီး ကျေးရွာ၏မြောက်ဖက် မီတာ ၄၀ သာကွာဝေးသည်။

မြေအောက်တွင် တစ်မီတာခန့်သာ မြှုပ်နှံထားသည့်ပိုက်လိုင်းတည်ရှိရာနေရာများကို  လေကြောင်းမှလည်းကောင်း၊ လက်နက်ကြီးဖြင့်သော်လည်းကောင်း အကြိမ်ကြိမ်တိုက်ခိုက်နေမှုများကြောင့် လက်နက်ကြီးကျည်က ပိုက်လိုင်းကို တိုက်ရိုက်ထိမှန်ပြီး ပြင်းထန်သောပေါက်ကွဲမှုဖြစ်ကာ ကျယ်ပြန့်သောအကွာအဝေးအထိ အရပ်သားပြည် သူပေါင်း များစွာအား ထိခိုက်မည်ကို ဒေသခံများက စိုးရိမ်လျက်ရှိပါသည်။

အဆိုပါစီမံကိန်းစတင်ကတည်းကသျှမ်းပြည်မြောက်ပိုင်း ပိုက်လိုင်းတစ်လျောက်တွင်နေထိုင်သောဒေသခံများသည် ပိုက်လိုင်းယိုစိမ့်မှုနှင့်ပေါက်ကွဲမှုကို စိုးရိမ်​ကြောက်ရွံ့ခဲ့ကြသည်.။

အောက်တိုဘာ ၂၉ မှ နို၀င်ဘာ ၂၈အထိ နောင်ချိုမြို့နယ်အတွင်း စစ်ကောင်စီ၏ လေကြောင်းတိုက်ခိုက်မှု၊ ပစ်ခတ်မှုနှင့်မြေမြုပ်မှိုင်းတို့ကြောင့် အရပ်သား ၈ဦးသေဆုံးပြီး ၉ဦးဒဏ်ရာရကာ အိမ်ခြေ ၄၀ကျော်ပျက်စီးခဲ့သည်။

နို၀င်ဘာ ၉မှဒီဇင်ဘာ၅အထိ သီပေါမြို့နယ်နှင့်ကျောက်မဲမြို့နယ်တို့တွင် စစ်ကောင်စီ၏ လေကြောင်းတိုက် ခိုက်မှု၊ ပစ်ခတ်မှုနှင့် မြေမြုပ်မှိုင်းတို့ကြောင့် အရပ်သား ၅ဦးသေဆုံးပြီး ၁၃ဦးဒဏ်ရာရကာ အိမ်ခြေ ၂၀ကျော် ပျက်စီးခဲ့သည်။

၂၀၂၃ နို၀င်ဘာ ၂၁ မှဒီဇင်ဘာ ၁၆အထိ နောင်ချိုမြို့နယ်အတွင်း စစ်ကောင်စီ၏ လေကြောင်းတိုက်ခိုက်မှု၊ပစ်ခတ် မှုနှင့်မြေမြုပ်မှိုင်းတို့ကြောင့် အရပ်သား ၁၄ဦးသေဆုံးပြီး ၁၁ဦးဒဏ်ရာရကာ အိမ်ခြေ ၁၀၀ကျော်ပျက်စီးခဲ့သည်။

ဆက်သွယ်ရန်

စိုင်းဟော်ရှဲန်                               +66 99 246 5673/  +66 94 728 6696      Signal  (ရှမ်း, အင်္ဂလိပ်)

ယိင်းလျန်းဟန်                            +66 99 289 6080                                     Signal (မြန်မာ)

Download PDF files >>> Shan Burmese English