၁၀၂၇ စစ်ဆင်ရေးကာလအတွင်း ကုန်သွယ်ရေးလမ်းမတစ်လျောက် စစ်ကောင်စီကိုအလုံးအရင်းနှင့် တိုက်ခိုက် မှုများသည်တရုတ်မြန်မာစီးပွားရေးစင်္ကြန်စီမံကိန်းရင်းနှီးမြုပ်နှံမှု၏ အချိန်မတန်သေးမှုများကို မီးမောင်း ထိုးပြ နေ

ရှမ်းလူ့အခွင့်အရေးမဏ္ဍိုင်မှ နောက်ဆုံးရ လူ့အခွင့်အရေး ချိုးဖေါက်မှုထုတ်ပြန်ချက်

၂၀၂၄ ခုနှစ် ဧပြီလ ၁1 ရက်

၁၀၂၇ စစ်ဆင်ရေးကာလအတွင်း ကုန်သွယ်ရေးလမ်းမတစ်လျောက် စစ်ကောင်စီကိုအလုံးအရင်းနှင့် တိုက်ခိုက် မှုများသည်တရုတ်မြန်မာစီးပွားရေးစင်္ကြန်စီမံကိန်းရင်းနှီးမြုပ်နှံမှု၏ အချိန်မတန်သေးမှုများကို မီးမောင်းထိုးပြနေ

၁၀၂၇ စစ်ဆင်ရေးအတွင်း ရှမ်းပြည်မြောက်ပိုင်းမှ မြို့နယ် ၅မြို့နယ်ရှိ ကုန်သွယ်ရေးအဝေးပြေး လမ်းမကြီးများတွင်စစ်ကောင်စီ၏ လေကြောင်းနှင့် လက်နက်ကြီးများဖြင့် ပစ်ခတ်တိုက်ခိုက်မှုများသည် တရုတ်-မြန်မာ စီးပွားရေးစင်္ကြန်စီမံကိန်းရင်းနှီးမြုပ်နှံမှုများပြုလုပ်ရန် အချိန်မတန်သေးကြောင်း သိသာထင်ရှားစွာ မီးမောင်းထိုးပြနေသည်။

မူဆယ်၊ကွတ်ခိုင်၊သိန္နီ၊ကွမ်းလုံနှင့် လားရှိုးမြို့နယ်များတွင် ၁၀၂၇ စစ်ဆင်ရေးအစဖြစ်သည့် ၂၀၂၃ခုနှစ်၊ အောက်တိုဘာလ ၂၇ရက်နေ့မှ စတင်ပြီးစစ်ကောင်စီနှင့် ညီနောင်မဟာမိတ်(၃)ဖွဲ့တို့ အပစ်အခတ်ရပ်စဲသော ၂၀၂၄ခုနှစ်၊ ဇန်နဝါရီလ ၁၁ရက်နေ့အထိ စစ်ကောင်စီ၏ လေကြောင်းတိုက်ခိုက်မှုများနှင့် လက်နက်ကြီးပစ် ခတ်မှုများသည် ရှမ်းပြည်မြောက်ပိုင်းနှင့် တရုတ်နိုင်ငံကို ဆက်သွယ်ထားသော အဓိကကုန်သွယ်ရေးလမ်း ကြောင်းနှစ်ခုဖြစ်သည့် မူဆယ်-သိန္နီ-လားရှိုး အဝေးပြေးလမ်းမကြီးနှင့် သိန္နီ-ချင်းရွှေဟော် အဝေးပြေး လမ်းမ ကြီးတို့ကို ဦးတည်တိုက်ခိုက်နေကြောင်း ဖော်ပြနေသည်။

စစ်ကောင်စီ၏ တိုက်ခိုက်မှုကြောင့် အဆိုပါမြို့နယ် ၅မြို့နယ်အတွင်း ကုန်သွယ်ရေးလမ်းကြောင်းများတလျှောက်ရှိ မြို့များနှင့်ကျေးရွာများမှ အရပ်သားထိခိုက်သေဆုံးမှု အနည်းဆုံး ၁၈၀ ကျော်ရှိခဲ့ပြီး အဆောက် အဦး ၃၀၀ ကျော် ထိခိုက်ပျက်စီး ခဲ့သည်။ အရပ်သား သောင်းချီ နေရပ်စွန့်ခွာထွက်ပြေးတိမ်းရှောင်ကြရပြီး ၎င်းတို့ထဲမှ အချို့မှာ တိုက်ပွဲများ ထပ်မံဖြစ်ပွားမည်ကို စိုးရိမ်သဖြင့် မိမိတို့နေရပ်သို့ မပြန်လာရဲသေးပေ။ စစ်ကောင်စီသည် လားရှိုးနှင့် မူဆယ်မြို့များကို ထိန်းချုပ်ထားပြီး ကချင်လွတ်မြောက်ရေးတပ်မတော် (KIA) က ထိန်းချုပ်ထားသော မူဆယ်-သိန္နီ အဝေးပြေးလမ်းမ အပိုင်းတွင် KIA နှင့် တိုက်ပွဲများ ဆက်လက်ဖြစ်ပွား နေသည်။ ဒေသတွင်းရှိ အရပ်သားများသည် မကြာသေးမီက ဖြစ်ပွားခဲ့သော တိုက်ပွဲများအတွင် ထောင်ထား ခဲ့သည့် မြေမြှုပ်မိုင်းအန္တရာယ်များကို ကြုံတွေ့နေရဆဲဖြစ်သည်။

မတ်လ ၁၁ရက်နေ့တွင် စစ်ကောင်စီနှင့် မြန်မာအမျိုးသားဒီမိုကရက်တစ် မဟာမိတ်တပ်မတော်(MNDAA) တို့အကြား ချင်းရွှေဟော်နယ်စပ်ဂိတ်ကို ပြန်လည်ဖွင့်လှစ်မည် ဟူသော သဘောတူညီချက်ရရှိခဲ့သော်လည်း လားရှိုးနှင့်ဆက်သွယ်ထားသော အဝေးပြေးလမ်းမကြီး တလျှောက်တွင် လုံခြုံရေးအာမခံချက်မရှိပဲ မတ်လ ၂၆ရက်နေ့က လားရှိုးတွင် MNDAA နှင့် စစ်ကောင်စီတပ်တို့ တိုက်ပွဲဖြစ်ပွားခဲ့သည်။ မတ်လအကုန်မှစ၍ စစ် ကောင်စီသည် ရာနှင့်ချီသော တပ်သားများကို ရဟတ်ယာဉ်ဖြင့် မူဆယ်မြို့နှင့် လားရှိုးမြို့များသို့ ပို့ဆောင် ခဲ့သည်။

ဆက်တိုက်ဖြစ်ပွားနေသော ပဋိပက္ခအတွင်း တရုတ်-မြန်မာစီးပွားရေးစင်္ကြံ၊ အထူးသဖြင့် စစ်ကောင်စီ၏ ပြင်း ထန်သောတိုက်ခိုက်မှုများဖြစ်ပွားရာဒေသများကို တိုက်ရိုက်ဆက်သွယ်ထားသည့် မူဆယ်-မန္တလေးအမြန်ရထားလမ်းတွင် ရင်းနှီးမြှုပ်နှံမှုများတိုးချဲ့လုပ်ဆောင်ရန် အင်မတန်အန္တရာယ် များပါသည်။ သို့ရာတွင် မကြာ သေးမီက ထုတ်ပြန်ထားသော သတင်းအရ စစ်ကောင်စီသည် တရုတ်ထံမှ အမေရိကန်ဒေါ်လာ ၈.၉ ဘီလီလံ တန်ဖိုးရှိသည့် စီမံကိန်းအတွက် ငွေချေးယူရန် စီစဉ်ထားသည်။

၁၀၂၇ စစ်ဆင်ရေးအတွင်း မူဆယ်မြို့နယ်တွင် စစ်ကောင်စီ၏ လေကြောင်းတိုက်ခိုက်မှုများနှင့် လက်နက်ကြီး ပစ်ခတ်တိုက်ခိုက်မှုများကြောင့် အရပ်သားထိခိုက်သေဆုံးမှုများ၊ ပျက်စီးဆုံးရှုံးမှုများ နှင့်ပတ်သက်သော အသေးစိတ်အချက်အလက်များ

၁၀၂၇ စစ်ဆင်ရေး အစတွင် ညီနောင်မဟာမိတ်သုံးဖွဲ့သည် ပန်ဆိုင်းနှင့် မုံးကိုးမြို့ နယ်နိမိတ်အနီးရှိ စစ်ကောင် စီတပ်စခန်းများကို တိုက်ခိုက်ခဲ့သည်။ တန်ပြန်သည့်အနေဖြင့် စစ်ကောင်စီသည် ၁၀၅မိုင် ကုန်သွယ်ရေးဇုန်မှ ပန်ဆိုင်းသို့ လက်နက်ကြီးများဖြင့် အဆင်အခြင်မဲ့ ပစ်ခတ်ခဲ့သဖြင့် အောက်တိုဘာလ ၃၀ရက်နေ့တွင် နေအိမ် ၅ လုံးထိခိုက်ပျက်စီးခဲ့ပြီး (၎င်းအနက် လက်နက်ကြီးကျည် တစ်လုံးသည် နယ်စပ်၊ တရုတ်ဖက်ခြမ်းရှိ ၀မ်တိန် သို့ကျရောက်ပေါက်ကွဲခဲ့သည်) နိုဝင်ဘာလ ၁ရက်နေ့တွင် အရပ်သားတစ်ဦး သေဆုံးခဲ့သည်။ သို့ရာတွင် နိုဝင် ဘာလ ၂ရက်နေ့တွင် ညီနောင်မဟာမိတ်သုံးဖွဲ့၏ ပန်ဆိုင်းကို သိမ်းပိုက်ခြင်းအား မဟန့်တားနိုင်ခဲ့ပါ။ ထို့နောက် စစ်ကောင်စီသည် ပန်ဆိုင်းကို ပြန်လည်သိမ်းပိုက်ရန် ကြိုးပမ်းခဲ့ပြီး ပန်ဆိုင်းသို့ လက်နက်ကြီးများ ဖြင့် တဖန် ပစ်ခတ်ပြန်သဖြင့် နိုဝင်ဘာလ ၁၉ရက်နေ့တွင် အရပ်သားတစ်ဦး သေဆုံးပြီး ထိုနေ့တွင်ပင် ညီနောင်မဟာမိတ်သုံးဖွဲ့သည် ပန်ဆိုင်းကို ပြန်လည်ထိန်းချုပ်နိုင်ခဲ့သည်။

ထိုအချိန်တွင် စစ်ကောင်စီသည် လေကြောင်းတိုက်ခိုက်မှုများပြုလုပ်ပြီး ညီနောင်မဟာမိတ်သုံးဖွဲ့ မုံးကိုးအား သိမ်းပိုက်ခြင်းကို ဟန့်တားရန်ကြိုးပမ်းခဲ့သည်။ နိုဝင်ဘာလ ၄ ရက်နေ့တွင် ပြုလုပ်သော လေကြောင်း တိုက် ခိုက်မှုကြောင့် မုံးကိုးမြို့အနီး ရှင်းကျိုက်ရွာမှ ကလေးငယ်၃ဦးအပါအဝင်အရပ်သား ၅ ဦး သေဆုံးခဲ့သည်။ သို့သော် လည်း နိုဝင်ဘာလ ၇ရက်နေ့တွင် ညီနောင်မဟာမိတ်သုံးဖွဲ့သည် မုံးကိုးမြို့ကို သိမ်းပိုက်ထိန်း ချုပ်နိုင် ခဲ့သည်။

နိုဝင်ဘာလ ၁၆ရက်နေ့တွင် ညီနောင်မဟာမိတ်သုံးဖွဲ့သည် ၁၀၅မိုင်ကုန်သွယ်ရေးဇုန်တွင် အခြေစိုက်သော စစ်ကောင်စီတပ်သားများကို တိုက်ခိုက်ခဲ့သည်။ စစ်ကောင်စီက တန်ပြန်သည့်အနေဖြင့် မူဆယ်မြို့နှင့် ပတ် ဝန်းကျင်ရွာများကို လေကြောင်းတိုက်ခိုက်မှုများနှင့် လက်နက်ကြီးပစ်ခတ်မှုများကို အဆင်အခြင်မဲ့ပြု လုပ်ခဲ့ သည်။ နိုဝင်ဘာလ ၁၉ရက်နေ့မှ ဒီဇင်ဘာလ ၁၁ရက်အတွင်း စစ်ကောင်စီ၏ လေကြောင်းတိုက်ခိုက်မှုနှင့် လက်နက်ကြီးပစ်ခတ်မှုများကြောင့် ထိုဒေသရှိ အရပ်သား ၁၅ ဦးသေဆုံးခဲ့ပြီး ၈ဦး ထိခိုက်ဒဏ်ရာရရှိခဲ့သည်။ နိုဝင်ဘာလ ၂၈ရက်နေ့တွင် ၁၀၅မိုင်ကျေးရွာမှ မော်တော်ဆိုင်ကယ်ဖြင့် ထွက်ပြေးရန်ကြိုးပမ်းသည့် အရပ်သား၂ဦး  (အမျိုးသား၁ဦးနှင့် အမျိုးသမီး၁ဦး)ကို စစ်ကောင်စီတပ်သားများက ပစ်သတ်ခဲ့သည်။ ဒီဇင်ဘာလ ၁၅ရက်နေ့တွင် ညီနောင်မဟာမိတ်သုံးဖွဲ့သည် ၁၀၅မိုင်ကျေးရွာရှိ စစ်ကောင်စီ၏ အခြေစိုက်တပ်စခန်းများမှ တပ်သားများကို တိုက်ထုတ်နိုင်ခဲ့ပြီး ကုန်သွယ်ရေးအချက်အချာကျသည့် မူဆယ်-လားရှိုး အဝေးပြေးလမ်းမကို ထိန်းချုပ်နိုင်ခဲ့သည်။

၁၀၅မိုင်အခြေစိုက်စခန်းများကို လက်လွှတ်ဆုံးရှုံးလိုက်ရသော်လည်း စစ်ကောင်စီတပ်သည် မူဆယ်ရှိ ၎င်းတို့၏ တပ်စခန်းများမှ အဆိုပါနေရာများသို့ လက်နက်ကြီးဖြင့် ဆက်လက်ပစ်ခတ်နေခဲ့သည်။ ဒီဇင်ဘာလ ၂၆ ရက် နေ့တွင် မူဆယ်မြို့ရှိ စစ်ကောင်စီတပ်သားများသည် ၁၀၅မိုက်ကျေးရွာသို့ လက်နက်ကြီးဖြင့် ပစ်ခတ်သဖြင့် အရပ်သား ၃ ဦးသေဆုံးပြီး ၅ ဦးဒဏ်ရာရရှိခဲ့သည်။ အရပ်သားများသည် ပဋိပက္ခတိုက်ပွဲများအတွင်း ထောင်ထားခဲ့သော မြေမြှုပ်မိုင်းအန္တရာယ်များကို ရင်ဆိုင်နေရဆဲဖြစ်ပြီး ၂၀၂၄ခုနှစ် ဇန်နဝါရီလကုန်တွင် မြေမြှုပ်မိုင်းကြောင့် မူဆယ်တဝိုက် လယ်သို့သွားသော၊ သို့မဟုတ် ထင်းရှာထွက်သော အရပ်သား အနည်းဆုံး အမျိုးသား ၆ ဦးနှင့် အမျိုးသမီး ၁ဦး ထိခိုက်ဒဏ်ရာရရှိခဲ့သည်။

၁၀၂၇ စစ်ဆင်ရေးအတွင်း ကွတ်ခိုင်မြို့နယ်တွင် စစ်ကောင်စီ၏ လေကြောင်းတိုက်ခိုက်မှုများနှင့် လက်နက်ကြီး ပစ်ခတ်တိုက်ခိုက်မှုများကြောင့် အရပ်သားထိခိုက်သေဆုံးမှုများ၊ ပျက်စီးဆုံးရှုံးမှုများ နှင့်ပတ်သက်သော အသေး စိတ်အချက်အလက်များ

အောက်တိုဘာလ ၂၇ရက်နေ့တွင် ညီနောင်မဟာမိတ်သုံးဖွဲ့သည် ကွတ်ခိုင်မြို့နယ်၌ စစ်ဆင်ရေးမပြုလုပ်ခဲ့ပါ။ သို့ရာတွင် နမ့်ဖတ်ကာအခြေစိုက် စစ်ကောင်စီတပ် ခလရ ၁၂၃ မှ တပ်သားများသည် ကျေးရွာအတွင်းသို့ လက်နက်ကြီးများ အဆင်အခြင်မဲ့ပစ်ခတ်ခဲ့သဖြင့် အရပ်သား၂ ဦးသေဆုံး၍ ၅ဦးထိခိုက်ဒဏ်ရာရရှိကာ နေအိမ် ၅လုံး ထိခိုက်ပျက်စီးခဲ့သည်။

၂၀၂၃ ခုနှစ်၊ အောက်တိုဘာလ ၃၀ရက်နေ့တွင် ညီနောင်မဟာမိတ်သုံးဖွဲ့သည် ကွတ်ခိုင်နှင့် နမ့်ဖတ်ကာ အကြား ရှိ နမ့်ခိုင် တံတားတွင် တပ်စွဲထားသော စစ်ကောင်စီတပ်စခန်းကို တိုက်ခိုက်ခဲ့သည်။ သို့သော် ဒီဇင်ဘာ လ ၂၀ရက်နေ့အထိ ကွတ်ခိုင်ရှိ စစ်ကောင်စီတပ်အား ဆက်လက်တိုက်ခိုက်ခြင်းမရှိခဲ့ပေ။

နိုဝင်ဘာလ ပထမအပတ်တွင် တိုက်ပွဲများဖြစ်ပွားခြင်းမရှိသော်လည်း စစ်ကောင်စီတပ်သည် ကွတ်ခိုင်မြို့နယ်ရှိ ကာလိုင် ကျေးရွာ၊ ဟိုခို ကျေးရွာ နှင့် နမ့်ဖတ်ခါကျေးရွာတို့ကို လေကြောင်းမှ ဗုံးကြဲတိုက်ခိုက်ခဲ့သဖြင့် အရပ် သား အမျိုးသား ၃ဦးသေဆုံးပြီး အခြား၃ဦးထိခိုက်ဒဏ်ရာရရှိခဲ့သည်။ စစ်ကောင်စီတပ်သည် ညီနောင်မဟာ မိတ်သုံးဖွဲ့နှင့် စစ်ကောင်စီပြည်သူ့စစ်တို့ တိုက်ပွဲဖြစ်ပွားရာ ကွတ်ခိုင်မြို့အရှေ့ဖက်ရှိ မုံးစီး နှင့် တာမိုးညဲ ကျေးရွာ အုပ်စုများကိုလည်း လေကြောင်းမှ ဗုံးကြဲတိုက်ခိုက်ခဲ့သဖြင့် အရပ်သား ၅၀၀၀ကျော် သည် တောထဲသို့ လည်းကောင်း၊ နီးစပ်ရာ ဘုရားကျောင်းများသို့လည်းကောင်း ထွက်ပြေးခိုလှုံခဲ့ရသည်။

နိုဝင်ဘာလ ၁၂ရက်နေ့တွင် တိုက်ပွဲများဖြစ်ပွားခြင်းမရှိသော်လည်း နမ့်ဖတ်ခါအခြေစိုက် စစ်ကောင်စီတပ် ခလ၇ ၁၂၃ မှ တပ်သားများသည် မူဆယ်-သိန္နီ အဝေးပြေးလမ်းမတလျှောက် လက်နက်ကြီးများ အဆင်အခြင် မဲ့ပစ်ခတ်ခဲ့သည်။ လက်နက်ကြီးကျည်များသည် မော်ဟစ် ကျေးရွာ သို့ကျရောက်ပေါက်ကွဲပြီး အရပ်သား ၂ဦး သေဆုံးခဲ့သည်။

စစ်ကောင်စီတပ်နှင့် ကချင်လွတ်မြောက်ရေးတပ်မတော် (KIA) တို့ နမ့်ဖတ်ခါကျေးရွာအရှေ့ဖက် ၂၀ကီလိုမီ တာအကွာရှိ တက္ကနိုင်းကျေးရွာတွင် စစ်ဖြစ်ပွားပြီး နောက်တစ်ရက်၊ နိုဝင်ဘာလ ၁၃ရက်နေ့တွင် စစ်ကောင်စီ သည် တက္ကနိုင်းကျေးရွာကို လေကြောင်းမှ ဗုံးကြဲတိုက်ခိုက်ခဲ့သဖြင့် ကျေးရွာသား ၁ဦးဒဏ်ရာရရှိပြီး နေအိမ်အချို့ ထိခိုက်ပျက်စီးခဲ့သည်။

နိုဝင်ဘာလ ၁၈ရက်နေ့မှ ဒီဇင်ဘာလ ၁၀ရက်နေ့အထိ ကွတ်ခိုင်နှင့် နမ့်ဖတ်ကာတွင် အခြေစိုက်သော စစ် ကောင် စီတပ်များသည် ၎င်းတို့၏ တပ်စခန်းမှနေ၍ ကွတ်ခိုင်မြို့နှင့် သိန္နီ-မူဆယ် အဝေးပြေးလမ်းမ တ လျှောက်ရှိ ကျေးရွာများအား လေကြောင်းတိုက်ခိုက်မှုများဆက်လက်ပြုလုပ်ခဲ့သဖြင့် အရပ်သား ၆ ဦးသေ ဆုံးပြီး နမ့်ဖတ်ခါတွင် အဆောင်နေသော ကလေး ၅ဦးအပါအဝင် ၁၅ဦးဒဏ်ရာရရှိခဲ့သည်။

၂၀၂၃ခုနှစ်၊ ဒီဇင်ဘာလ ၁၅ရက်နေ့မှ ၁၉ရက်နေ့အတွင်း ကွတ်ခိုင်မြို့ရှိ စစ်ကောင်စီတပ်သားများသည် အရပ် သား ၂ဦးကို တရားလက်လွတ် ပစ်သတ်ခဲ့ပြီး လမ်းမပေါ်ရှိ အခြားအရပ်သားနှစ်ဦးကိုလည်း ဒဏ်ရာရရှိ စေ ခဲ့သည်။

ဒီဇင်ဘာလ ၂၀ရက်နေ့တွင် ကွတ်ခိုင်မြို့၌ စစ်ကောင်စီနှင့် တအန်းအမျိုးသားလွတ်မြောက်ရေး တပ်မတော် (TNLA) အကြား တိုက်ပွဲပြင်းထန်ခဲ့သည်။ ဒီဇင်ဘာလ ၂၀ရက်နေ့မှ ၂၀၂၄ခုနှစ်၊ ဇန်နဝါရီလ ၃ရက်နေ့အထိ ကွတ်ခိုင်မြို့နှင့် အနီးရှိကျေးရွာများကို စစ်ကောင်စီတပ်မှ လက်နက်ကြီးများနှင့် လေကြောင်းတိုက်ခိုက် မှုများ ပြုလုပ်ခဲ့ခြင်းကြောင့် အရပ်သား ၆ဦးသေဆုံးကာ ၁၉ဦး ထိခိုက်ဒဏ်ရာရရှိခဲ့သည်။ ဇန်နဝါရီလ ၇ရက်နေ့တွင် TNLA သည် ကွတ်ခိုင်မြို့ကို ထိန်းချုပ်နိုင်ခဲ့ပြီး ထိုနေ့တွင် စစ်ကောင်စီက မြို့အတွင်း လေကြောင်းတိုက်ခိုက်မှု ပြုလုပ်ခဲ့သဖြင့် နေအိမ် ၁၅လုံး ထိခိုက်ပျက်စီးခဲ့သည်။

ဒီဇင်ဘာလ ၂၉ရက်နေ့တွင် နမ့်ဖတ်ကာကျေးရွာအုပ်စု၌ KIA နှင့် စစ်ကောင်စီတပ်အကြား တိုက်ပွဲ ဖြစ်ပွား ခဲ့သည်။ တစ်လခန့်ကြာ တိုက်ပွဲများဖြစ်ပွားခဲ့ပြီး KIA သည် ၂၀၂၄ခုနှစ် ဇန်နဝါရီလ ၂၄ရက်နေ့တွင် စစ်ကောင် စီတပ် ခလရ ၁၂၃ ကို သိမ်းပိုက်နိုင်ခဲ့ပြီး နမ့်ဖတ်ကာကို ထိန်းချုပ်နိုင်ခဲ့သည်။ တိုက်ပွဲအတွင်း စစ်ကောင်စီသည် နမ့်ဖတ်ခါကို လေကြောင်းတိုက်ခိုက်မှုများစွာပြုလုပ်ခဲ့သဖြင့် ဒေသခံ ၂၀၀၀ ကျော် နေရပ်စွန့်ခွာထွက် ပြေးခဲ့ ကြရသည်။ စစ်ကောင်စီ၏ နမ့်ဖတ်ကာဒေသအတွင်း ဆက်သွယ်ရေးဖြတ်တောက်မှုများကြောင့် SHRF အနေဖြင့် နမ့်ဖတ်ခါရှိ လေကြောင်းတိုက်ခိုက်မှုကြောင့် ပျက်စီးဆုံးရှုံးမှုအခြေအနေ အသေးစိတ်အချက် အ လက်များကို မသိရပါ။ သို့ရာတွင် ဒေသခံများ၏ တင်ပြချက်အရ အရပ်သား ၃၀ဦးသေဆုံးပြီး ၂၀ဦး ဒဏ်ရာ ရရှိကာ နေအိမ် ၅၀၀ ကျော်ထိခိုက်ပျက်စီး၍ အနည်းဆုံးနေအိမ်၂၅လုံး မီးလောင်ပြာကျခဲ့သည်။

၁၀၂၇ စစ်ဆင်ရေးအတွင်း သိန္နီမြို့နယ်တွင် စစ်ကောင်စီ၏ လေကြောင်းတိုက်ခိုက်မှုများနှင့် လက်နက်ကြီး ပစ်ခတ်တိုက်ခိုက်မှုများကြောင့် အရပ်သားထိခိုက်သေဆုံးမှုများ၊ ပျက်စီးဆုံးရှုံးမှုများ နှင့်ပတ်သက်သော အသေး စိတ်အချက်အလက်များ

တရုတ်နိုင်ငံနယ်စပ်နှင့် ပို့ဆောင်ဆက်သွယ်ရေးလမ်းကြောင်းနှစ်ခုဆုံရာတွင် တည်ရှိသော သိန္နီမြို့သည် ၁၀၂၇ စစ်ဆင်ရေးစတင်ပြီးချိန်မှစ၍ ညီနောင်မဟာမိတ်သုံးဖွဲ့နှင့် ၎င်းတို့၏မဟာမိတ် PDF များအတွက် ဗျူဟာကျ သောနေရာ ဖြစ်လာသည်။ အောက်တိုဘာလ ၂၇ရက်တွင် ဖြစ်ပွားသော ပြင်းထန်သည့်တိုက်ပွဲများကြောင့် ဒေသခံများစွာသည် ဒေသအတွင်းရှိ ဘုန်းကြီးကျောင်းများသို့ ထွက်ပြေးခိုလှုံခဲ့ကြရသည်။ နမ္မတူမြစ်တောင် ဖက်တွင် အခြေစိုက်သော စစ်ဆင်ရေးကွပ်ကဲမှုဌာနချုပ် စကခ-၁၆ ရှိ စစ်ကောင်စီတပ်သားများသည် သိန္နီမြို့ တွင်းနှင့် စစ်ဘေးရှောင်များ ခိုလှုံနေသည့် ကျောင်းခမ်းဘုန်းကြီးကျောင်းရှိရာ ကောင်းဟော် ကျေးရွာအပါအဝင် အနီးရှိကျေးရွာများသို့ လက်နက်ကြီးများဖြင့် စတင်ပစ်ခတ်ခဲ့သည်။ အောက်တိုဘာလ ၂၈ရက်နေ့တစ် နေ့ တည်းတွင် စစ်ကောင်စီ၏ လက်နက်ကြီးပစ်ခတ်မှုကြောင့် နေအိမ် ၅၀ကျော် ထိခိုက်ပျက်စီးခဲ့ပြီး အရပ်သား ၁ဦး သေဆုံးကာ ၂ဦး ဒဏ်ရာရရှိခဲ့သည်။

အောက်တိုဘာလ ၂၉ ရက်နေ့တွင် ညီနောင် မ ဟာ မိတ်သုံးဖွဲ့သည် သိန္နီမြို့ကို သိမ်းပိုက်ထိန်း ချုပ်နိုင်ခဲ့သည်။ သို့သော် မြို့၏တောက်ဖက် တွင် အခြေစိုက်သော စစ်ဆင်ရေးကွပ်ကဲမှုဌာ န ချုပ် စကခ-၁၆အပါအဝင်  စစ် ကောင် စီတပ် စခန်းများကို မသိမ်းပိုက်နိုင်ခဲ့ပါ။ ထို့နောက် စစ် ကောင်စီတပ်သည် လက်နက်ကြီးများ ဖြင့်သော် လည်းကောင်း၊ ရဟတ်ယာဉ်ဖြင့်သော်လည်း ကောင်း မြို့တွင်းနှင့် အနီးနားရှိ ကျေးရွာများကို ပစ်ခတ်သဖြင့် ဒေသခံများစွာသည် ၎င်းတို့၏ နေရပ်ကို စွန့်ခွာ၍ ထွက်ပြေးတိမ်းရှောင်ခဲ့ရသည်။ ထိုညတွင် စစ်ဆင်ရေးကွပ်ကဲမှုဌာနချုပ် စကခ-၁၆မှ ပစ်ခတ်လိုက်သော လက်နက်ကြီးများသည် မြို့တောင်ဖက်ရှိ ခူး၀ိန်း နှင့် တိုင်ယက် ကျေးရွာများသို့ ကျရောက်ပေါက်ကွဲသဖြင့် နေအိမ် ၂၀လုံးကျော် မီးလောင်ပြာကျခဲ့သည်။

ထိုတချိန်တည်းမှာပင် စစ်ကောင်စီတပ်သားများသည် ကောင်းဟော်ကျေးရွာရှိ ကျောင်းခမ်းဘုန်းကြီးကျောင်းမှ စစ်ဘေးရှောင်ဒုက္ခသည် ၃၀၀၀ ခန့်ကို ၎င်းတို့၏ စကခ-၁၆ ရှေ့တွင် လူသားဒိုင်းအဖြစ် အသုံးပြုပြီး စစ်ဘေး ရှောင် များကိုလည်း ထွက်ခွာခွင့်မပေးပဲ စစ်ဘေးရှောင်များ၏ ဖုန်းများ စစ်ဆေးခြင်း၊ စစ်ဘေးရှောင်များ လူသားချင်စာနာမှုအကူအညီများမရအောင် ပိတ်ပင်ခြင်းများ ပြုလုပ်ခဲ့သည်။ စစ်ကောင်စီ စကခ-၁၆ မှ အဆင် အခြင်မဲ့ပစ်ခတ်လိုက်သော လက်နက်ကြီးကျည်များသည် ကောင်းဟော် ကျေးရွာသို့ တိုက်ရိုက်ကျရောက် ပေါက်ကွဲခဲ့သည်။ အောက်တိုဘာလ ၂၈ ရက်နှင့် ၃၁ရက်နေ့အတွင်း ကောင်းခမ်းစစ်ဘေးရှောင်စခန်းမှ အမျိုး သား ၃ဦးသည် စစ်ကောင်စီ၏ သတ်ဖြတ်ခြင်းကို ခံခဲ့ရသည်။ အမျိုးသားတစ်ဦးသည် ဒဏ်ရာရရှိပြီးနောက် ဆေးကုသမှုမရရှိသည့်အတွက် သွေးထွက်လွန်ပြီး သေဆုံးခဲ့သည်။

အောက်တိုဘာလကုန်မှ ၂၀၂၄ခုနှစ် ဇန်နဝါရီလ ပထမအပတ်အထိ စစ်ကောင်စီတပ်သားများသည် လက် နက်ကြီးများပစ်ခတ်ခြင်း၊ ဗုံးကြဲခြင်းနှင့် မြို့တွင်းနှင့် အနီးရှိကျေးရွာများသို့ အဆင် အခြင်မဲ့ ပစ်ခတ်ခြင်းများ ဆက်လက်ပြုလုပ်ခဲ့သည်။ ၂၀၂၄ခုနှစ်၊ ဇန်နဝါရီလ ၇ရက်နေ့တွင် ညီနောင်မဟာမိတ်သုံးဖွဲ့သည် စစ်ကောင် စီတပ် စကခ-၁၆ နှင့် သိန္နီမြို့တောင်ဖက်ရှိ အခြားတပ်စခန်းများကို သိမ်းပိုက်နိုင်ခဲ့သည်။

၁၀၂၇ စစ်ဆင်ရေးအတွင်း သိန္နီမြို့တွင် စစ်ကောင်စီ၏ တိုက်ခိုက်မှုများကြောင့် အရပ်သားထိခိုက် သေဆုံးမှု စုစုပေါင်းမှာ သေဆုံးသူ ၁၇ဦး၊ ဒဏ်ရာရရှိသူ ၂၇ဦးနှင့် ထိခိုက်ပျက်စီးသော အဆောက်အဦး ၁၆၅ ကျော် တို့ဖြစ် သည်။

၁၀၂၇ စစ်ဆင်ရေးအတွင်း ကွမ်းလုံမြို့နယ်တွင် စစ်ကောင်စီ၏ လေကြောင်းတိုက်ခိုက်မှုများနှင့် လက်နက်ကြီး ပစ်ခတ်တိုက်ခိုက်မှုများကြောင့် အရပ်သားထိခိုက်သေဆုံးမှုများ၊ ပျက်စီးဆုံးရှုံးမှုများ နှင့်ပတ်သက်သော အသေးစိတ်အချက်အလက်များ

အောက်တိုဘာလ ၂၇ရက်နေ့တွင် ညီနောင်မဟာမိတ်သုံးဖွဲ့နှင့် မဟာမိတ်PDF တို့သည် တရုတ်နယ်စပ်၊ ချင်းရွှေဟော်ရှိ စစ်ကောင်စီ ရဲစခန်းကို တိုက်ခိုက်ခဲ့သည်။ နောက်ရက်များတွင် ကွမ်းလုံမြို့နယ်၊ သန္နီ-ချင်း ရွှေဟော် အဝေးပြေးလမ်းရှိ စစ်ကောင်စီတပ်စခန်းများကို တိုက်ခိုက်ခဲ့သည်။

အောက်တိုဘာလ ၃၁ ရက်နေ့တွင် ညီနောင်မဟာမိတ်သုံးဖွဲ့နှင့် မဟာမိတ်အဖွဲ့တို့သည် ကွမ်းလုံမြို့ အနောက် တောင်ဖက် ကီလိုမီတာ ၂၀ခန့် အကွာရှိ ကမ်မိုင်းအခြေစိုက် စစ်ကောင်စီတပ် ခလရ ၁၄၃ ကိုထိုးစစ်ဆင်ခဲ့ပြီး နိုဝင်ဘာလ ၂ရက်နေ့တွင် သံလွင်မြစ်အရှေ့ဖက်ခြမ်း ကွမ်းလုံ-ချင်းရွှေဟော် အဝေးပြေးလမ်းမကို ထိန်းချုပ် နိုင်ခဲ့သည်။ နိုဝင်ဘာလ ၆ ရက်နေ့တွင် သံလွင်မြစ်အနောက်ဖက်၊ ကွမ်းလုံမြို့အနီး စစ်ကောင်စီအခြေ စိုက် တပ်စခန်းများတဝိုက်၌ တိုက်ပွဲများဖြစ်ပွားခဲ့ပြီး ညီနောင်မဟာမိတ်သုံးဖွဲ့က ထိုအခြေစိုက်စခန်းများကို သိမ်းပိုက်နိုင်ကြောင်း ကြေညာသည့် နိုဝင်ဘာလ ၉ရက်နေ့အထိ တိုက်ပွဲများ အလွန်ပြင်းထန်ခဲ့သည်။

ထိုအချိန်အတောအတွင်း စစ်ကောင်စီသည် ကွမ်းလုံမြို့တဝိုက်တွင် လေကြောင်းတိုက်ခိုက်မှုများ ပြုလုပ်ခဲ့ သည်။ အောက်တိုဘာလ ၃၀ရက်နေ့တွင် စစ်ကောင်စီတပ်ပစ်ခတ်လိုက်သော ဗုံးသည် သံလွင်မြစ်ကူး ကွမ်းလုံ တံတားဟောင်းဘေးရှိ တံတားကျေးရွာသို့ ကျရောက်ပေါက်ကွဲခဲ့ပြီး အရပ်သား ၁ဦးသေဆုံးကာ သူ၏အိမ် ထိခိုက်ပျက်စီးခဲ့သည်။ ကွမ်းလုံတံတားဟောင်းသည်လည်း ထိခိုက်ပျက်စီးခဲ့သည်။ အောက်တိုဘာလ ၃၁ရက် နေ့ တွင် စစ်ကောင်စီကြဲသော ဗုံးကြောင့် ကွမ်းလုံမြို့တောင်ဖက်၊ မတ်ခန် ကျေးရွာရှိ အရပ်သား ၁ဦးထပ်မံသေ ဆုံးခဲ့သည်။

တရုတ်နိုင်ငံ၏ ထောက်ပံ့မှုဖြင့် သံလွင်မြစ်ပေါ်တွင် ဆောက်လုပ်ထားသော ကွမ်းလုံတံတားသစ်သည် ၂၀၂၃ ခုနှစ်တွင် ပြီးစီးခဲ့ပြီး ၂၀၂၃ခုနှစ်၊ နိုဝင်ဘာလတွင် တံတားဖွင့်ပွဲကျင်းပရန် စီစဉ်ထားသော်လည်း ၁၀၂၇ စစ်ဆင်ရေးဖြစ်ပွားခဲ့သဖြင့် ဖွင့်ပွဲကို မကျင်းပနိုင်ခဲ့ပါ။

ကွမ်းလုံမြို့

၁၀၂၇ စစ်ဆင်ရေးအတွင်း လားရှိုးမြို့နယ်တွင် စစ်ကောင်စီ၏ လေကြောင်းတိုက်ခိုက်မှုများနှင့် လက်နက် ကြီးပစ် ခတ်တိုက်ခိုက်မှုများကြောင့် အရပ်သားထိခိုက်သေဆုံးမှုများ၊ ပျက်စီးဆုံးရှုံးမှုများ နှင့်ပတ်သက်သော အသေးစိတ်အချက်အလက်များ

၂၀၂၃ခုနှစ်၊ အောက်တိုဘာလ ၂၇ရက်နေ့မှစတင်၍ လားရှိုးမြို့မြောက်ဖက် ၁၀ကီလိုမီတာခန့်အကွာ၊ ဟိုပိတ် ကျေးရွာ၊ လားရှိုး-မူဆယ် အဝေးပြေးလမ်းမကြီးပေါ်ရှိ တိုးဂိတ်တွင်လည်းကောင်း၊ မြို့၏အရှေ့ဖက် မိုင်းယော် လမ်းမတွင်လည်းကောင်း ညီနောင်မဟာမိတ်သုံးဖွဲ့နှင့် စစ်ကောင်စီတပ်တို့ တိုက်ပွဲပြင်းထန်ခဲ့သည်။ တိုက် ပွဲသည် မြို့၏ မြောက်ဖက်နှင့် အရှေ့ဖက်သို့ ပျံ့နှံ့သွားပြီး စစ်ကောင်စီ စစ်ကြောင်းအချို့ အခြေစိုက်ရာ သံလွင် မြစ် အနီးရှိ မိုင်းကြတ်ကျေးရွာအုပ်စုသို့လည်း ပျံ့နှံ့သွားသည်။ စစ်ကောင်စီတပ်သည် လားရှိုးမြို့ပတ်ပတ် လည် ရှိ ကျေးရွာများနှင့် လားရှိုးမြိုနယ် အရှေ့ဖက်ရှိကျေးရွာများကို  လေကြောင်းတိုက်ခိုက်မှုများနှင့် လက်နက်ကြီး ပစ်ခတ်မှုများကို အဆင်အခြင်မဲ့ပြုလုပ်ခဲ့သည်။

နိုဝင်ဘာလကုန်တွင် ညီနောင်မဟာမိတ်သုံးဖွဲ့သည် မိုင်းကြတ် နှင့် မိုင်းယော်ကျေးရွာတွင် အခြေစိုက်သော စစ်ကောင်စီတပ်စခန်းများကို သိမ်းပိုက်နိုင်ခဲ့ပြီး လားရှိုးမြို့တဝိုက်ကို ထပ်မံတိုက်ခိုက်ခြင်းမပြုပဲ စစ်ဆင်ရေးကို ရပ်တန့်ခဲ့သော်လည်း စစ်ကောင်စီက ထိုဒေသအတွင်း လေကြောင်းနှင့် လက်နက်ကြီးပစ် ခတ်တိုက် ခိုက်မှုများကို ဇန်နဝါရီလ အစောပိုင်းအထိ ပြုလုပ်ခဲ့သည်။ အောက်တိုဘာလ ၂၇ရက်နေ့မှ ဇန်နဝါရီလ ၇ရက်နေ့အထိ စစ်ကောင်စီ မြောက်ပိုင်းတိုင်းစစ်ဌာနချုပ်နှင့် မြို့အတွင်းရှိ အခြားအခြေစိုက်တပ်စခန်းများမှ လေကြောင်းတိုက်ခိုက်မှုများနှင့် လက်နက်ကြီးပစ်ခတ်မှုများကြောင့် လားရှိုးမြို့အနီးကျေးရွာများရှိ အရပ်သား ၁၈ဦးသေဆုံးပြီး ၆ဦးဒဏ်ရာရကာ အဆောက်အဦး ၄၀ကျော် ထိခိုက်ပျက်စီးခဲ့သည်။

စစ်ကောင်စီတပ်သားများသည် လမ်းမပေါ်ရှိ အရပ်သားပြည်သူများကိုလည်း ရမ်းသမ်းပစ်ခတ်သေးသည်။ ၂၀၂၃ခုနှစ် နိုဝင်ဘာလ ၃ရက်နေ့မှ ၂၀၂၄ခုနှစ် ဇန်နဝါရီလ ၁၄ရက်နေ့အထိ စစ်ကောင်စီတပ်သားများသည် အရပ်သား ၆ဦးကို ပစ်သတ်ခဲ့သည်။ ပစ်သတ်ခံရသော အရပ်သားများသည် လမ်းလျှောက်နေသူများ သို့မဟုတ် မော်တော်ဆိုင်ကယ်စီးနင်း နေသူများဖြစ်သည်။ ၁ဦးမှာ နမ့်ပေါင်ကျေးရွာမှဖြစ်၍ ၅ဦးမှာ လားရှိုးမြို့တွင်းမှ ဖြစ်ပြီး ရပ်ကွက် ၃တွင် အမှိုက်ကောက်သော စိတ်မနှံ့သူ ၁ဦးလည်းပါသည်။

၁၀၂၇ စစ်ဆင်ရေးစတင်ချိန်မှစ၍ ဇန်နဝါရီလ ၁၁ရက်နေ့ အပစ်အခတ်ရပ်စဲသည့်အချိန်အထိ လားရှိုးမြို့ ပတ်ပတ်လည်နှင့် မြို့နယ်အတွင်း ကျေးရွာများမှ ဒေသခံ ၂၀၀၀၀ ကျော်သည် လားရှိုးမြို့ရှိ ဘုန်းကြီး ကျောင်းများနှင့် ဘုရားကျောင်းများတွင် စစ်ဘေးရှောင်ခိုလှုံရန် ထွက်ပြေးလာခဲ့ရသည်။ ၎င်းစစ်ဘေး ရှောင်များ အနက် အများစုမှာ ၎င်းတို့နေရပ်များသို့ ပြန်သွားခဲ့ပြီဖြစ်သော်လည်း ၅၀၀ ခန့် ကျန်ရှိနေသေးသည်။

ဆက်သွယ်ရန်

စိုင်းဟော်ရှဲန်                             +66 99 246 5673/  +66 94 728 6696      Signal  (ရှမ်း, အင်္ဂလိပ်)

ယိင်းလျန်းဟန်                           +66 99 289 6080                                          Signal (မြန်မာ)

Dawnload PDF files>>> Shan Burmese English