ရှမ်းပြည်နယ်အရှေ့ပိုင်းရှိ တရုတ်မြေရှားသတ္တုတွင်းများတွင် လူကုန်ကူးခံရသော အွန်လိုင်းငွေလိမ်ဂိုဏ်း မှ မြန်မာအလုပ်သမားများကို ကျွန်ပြုခိုင်းစေနေ

ကိုသက်၏ ထွက်ဆိုချက်သည် ရှမ်းပြည်နယ်အရှေ့ပိုင်းရှိ သတ္တုတွင်းများသည် ဥပဒေပြင်ပတွင် လုံးဝကင်းလွတ်စွာ လုပ်ကိုင်နေကြသည်ကို မီးမောင်းထိုးပြနေသည်။ သတ္တုတွင်းအများစုသည် ပတ်ဝန်းကျင်ထိန်းသိမ်းရေးဆိုင်ရာ စည်းမျဉ်းများကို လိုက်နာရန် ပျက်ကွက်နေပြီး မြန်မာနိုင်ငံအတွင်းနှင့် နယ်စပ်ဖြတ်ကျော် မြစ်ချောင်းများအတွင်းသို့ အန္တရာယ်ရှိသော ညစ်ညမ်းမှုများကို ဖြစ်စေနေသည်မှာ လူသိရှင်ကြားဖြစ်နေပြီးသား ဖြစ်သည်။ ယခုအခါ တရုတ်သတ္တုတွင်း လုပ်ငန်းရှင်များသည် တရုတ်အွန်လိုင်း  ငွေလိမ်ဂိုဏ်းများနှင့် ပူးပေါင်းကာ မြန်မာလူငယ်များကိုလူကုန်ကူး၍ သတ္တုတွင်း အလုပ်သမားများအဖြစ် ကျွန်ပြုနေခြင်းမှာ စည်းမျဉ်းစည်းကမ်းများ ပျက်ကွက်နေရုံရုံသာမက၊ ပို၍ ဆိုးသည်မှာ ရှမ်းပြည်နယ်၏ မြေယာနှင့် သယံဇာတများကို ရာဇဝတ်ဂိုဏ်းများနှင့် ဆက်နွှယ်နေသော နိုင်ငံခြားရင်းနှီးမြှုပ်နှံသူများထံ လွှဲပြောင်းပေးထားသကဲ့သို့ ဖြစ်နေခြင်းပင်ဖြစ်သည်။ ၎င်းတို့သည် သဘာဝပတ်ဝန်းကျင်နှင့် ဒေသခံပြည်သူများ၏ ဘဝများကို ထည့်တွက်ခြင်းမရှိဘဲ အမြတ်ထုတ်ရန်သာ စိတ်ဝင်စားကြသည်။

ဤဖြစ်ရပ်သည် ရှမ်းပြည်နယ်ရှိ သတ္တုတွင်းများကြောင့် နယ်စပ်ဖြတ်ကျော် မြစ်ရေညစ်ညမ်းမှုဒဏ်ကို ခံစားနေရသော ဒေသတွင်းနိုင်ငံများအတွက် သတိပေးခေါင်းလောင်းသံ ဖြစ်သင့်ပါသည်။ သတ္တုတွင်း များကို စည်းကမ်းတကျဖြစ်စေရန် မြန်မာစစ်ကောင်စီကို တောင်းဆိုနေခြင်းမှာ အကျိုးမရှိ ကြောင်း ပြသနေပါသည်။ ဤပြဿနာကို အဓိပ္ပာယ်ရှိရှိ ဖြေရှင်းနိုင်မည့် တစ်ခုတည်းသော နည်းလမ်းမှာ သတ္တုတွင်းကဏ္ဍတွင် မြေယာနှင့်သယံဇာတ အချုပ်အခြာအာဏာကို ကာကွယ်ပေးပြီး ပြည်သူ့ အကျိုးစီးပွားကို ဦးစားပေးမည့်၊ ပြည်သူက ရွေးကောက်တင်မြှောက်ထားသော ဖက်ဒရယ် ဒီမိုကရေစီ အစိုးရ၏ ထိန်းချုပ်မှုအောက်သို့ ရောက်ရှိစေရန်သာ ဖြစ်ပါသည်။

တာချီလိတ်မြို့ရှိ အွန်လိုင်းငွေလိမ်လုပ်ငန်း နောက်ခံသမိုင်းကြောင်း

တာချီလိတ်မြို့သည် နေပြည်တော်အာဏာပိုင်များ၏ အပြည့်အဝထိန်းချုပ်မှုအောက်တွင် ရှိနေ သော်လည်း ရှမ်းပြည်နယ်အရှေ့တောင်ပိုင်းရှိ အွန်လိုင်းငွေလိမ်လုပ်ငန်းများ၏ အဓိက ဗဟိုချက် အဖြစ် ဆက်လက် တည်ရှိနေဆဲဖြစ်သည်။ ကိုသက်၏ ပြောပြချက်အရ တာချီလိတ်တွင် အွန်လိုင်း ငွေလိမ်လုပ်ငန်းများကို ၂၀၂၂ ခုနှစ်တွင် စတင်တည်ထောင်ခဲ့သော်လည်း၊ ၂၀၂၃ ခုနှစ်နှောင်းပိုင်းတွင် အရေအတွက် သိသိသာသာ မြင့်တက်လာခဲ့သည်။ ထိုသို့ဖြစ်ရခြင်းမှာ ရှမ်းပြည်နယ်မြောက်ပိုင်းရှိ ‘၁၀၂၇ စစ်ဆင်ရေး’ အတွင်း အွန်လိုင်းငွေလိမ်လုပ်ငန်းများကို နှိမ်နင်းမှုများကြောင့် တရုတ်အွန်လိုင်း ငွေလိမ်သမား အမြောက်အမြားသည် ယင်းနှိမ်နင်းမှုများမှ လွတ်မြောက်ရန် ဤဒေသသို့ ပြောင်းရွှေ့ လာကြသောကြောင့် ဖြစ်သည်။

တာချီလိတ်သို့ ပြောင်းရွှေ့လာသည့် ဆိုင်ဘာငွေလိမ်ဂိုဏ်းများသည် ကနဦးတွင် လက်ရှိရှိနှင့် ပြီးသားဖြစ်သော အွန်လိုင်းကာစီနိုဝင်းကြီးများအတွင်း၌ “နိုင်ငံခြားအွန်လိုင်း” ဟု ဒေသအခေါ်ရှိသည့် ငွေလိမ်လုပ်ငန်းများကို စတင်လုပ်ကိုင်ခဲ့ကြသည်။ များသောအားဖြင့် ထပ်ခိုးအထပ်မြင့် အဆောက်အအုံများစွာပါဝင်သည့် ကျယ်ဝန်းသော ထိုဝင်းများအတွင်း ကာစီနိုဂိမ်းများနှင့်အတူ ငွေလိမ်လုပ်ငန်းများကိုပါ တွဲဖက်လုပ်ကိုင် ကြခြင်းဖြစ်သည်။

၂၀၂၄ ခုနှစ် အစောပိုင်းတွင် တာချီလိတ်သည် ငွေလိမ်လုပ်ငန်းများ၏ ဗဟိုချက်အသစ်အဖြစ် နာမည်ဆိုးဖြင့် ကျော်ကြားလာခဲ့သည်။ ထိုပြဿနာကို ဖြေရှင်းနေသည်ဟု အထင်ခံရစေရန်အတွက် စစ်ကောင်စီ အာဏာပိုင်များသည် တာချီလိတ်ရှိ ငွေလိမ်လုပ်ငန်းများကို “ဝင်ရောက်စီးနင်းနှိမ်နင်းမှုများ” စတင်လုပ်ဆောင်ခဲ့သည်။ ၎င်းတို့သည် ရွေးချယ်ထားသော အဆောက်အအုံအချို့ကို ဝင်ရောက်စီးနင်းပြီး ငွေလိမ်လုပ်သားအုပ်စုများကို ဖမ်းဆီးခဲ့သော်လည်း ငွေလိမ်လုပ်ငန်းမန်နေဂျာများကိုမူ ထိခိုက်မှု မရှိစေဘဲ လွှတ်ပေးထားခဲ့သည်။ အချို့သော ငွေလိမ်လုပ်ငန်းရှင်များသည် နယ်မြေအတွင်း ခဏတဖြုတ် ပုန်းအောင်းနေခြင်း သို့မဟုတ် မြဝတီ သို့မဟုတ် လာအိုနိုင်ငံရှိ ရွှေတြိဂံအထူးစီးပွားရေးဇုန်ကဲ့သို့သော အခြားငွေလိမ်ဗဟိုချက်များသို့ ပြောင်းရွှေ့သွားကြသည်။ သို့သော် အချို့မှာမူ လုပ်ငန်းအတိုင်းအတာကို လျှော့ချပြီး တာချီလိတ်မြို့ပတ်ဝန်းကျင်ရှိ လူမသိနိုင်သော နေရာများသို့ ပြောင်းရွှေ့ခဲ့ကြသည်။ ဆိုလို သည်မှာ တာချီလိတ်ရှိ ငွေလိမ်လုပ်ငန်းများသည် လုံးဝရပ်ဆိုင်းသွားခြင်း မရှိခဲ့ပေ။

ပြယုဒ်အဖြစ် ဟန်ပြနှိမ်နင်းမှုများ ပြုလုပ်သော်လည်း ငွေလိမ်လုပ်ငန်းများကို ပုံစံတစ်မျိုးမဟုတ် တစ်မျိုးဖြင့် ဆက်လက်တည်ရှိခွင့် ပေးထားသည့် ဤပုံစံသည် ယနေ့တိုင် တာချီလိတ်တွင် ဆက်လက် ဖြစ်ပွားနေဆဲ ဖြစ်သည်။

UWSA ၏ ရောင်နီဦး ငွေလိမ်ဝင်း

ကိုသက်၏ လူကုန်ကူးခံရမှုသည် တာချီလိတ်မြို့ အရှေ့ပိုင်း၊ ဟောင်လိတ်ရပ်ကွက်ရှိ “ရောင်နီဦး ရီဆော့စ်” (Yaung Ni Oo Resort) ဟုခေါ်သော အထင်ကရ ငွေလိမ်ဝင်းကြီးတစ်ခုတွင် စတင်ခဲ့သည်။ ၎င်းသည် UWSA ၏ တာချီလိတ်ဆက်သွယ်ရေးရုံးနှင့် ကပ်လျက်တွင်ရှိပြီး တစ်ဝင်းလုံးကို UWSA က ပိုင်ဆိုင်ကာ ထိန်းချုပ်ထားသည်။ မူလက ထိုနေရာရှိ လူလုပ်ကန်ကြီးကြောင့် “ငါးကန်” ဟု လူသိများသော ဤဝင်းသည် ၂၀၀၆ ခုနှစ်ကတည်းက နာမည်ဆိုးဖြင့် ကျော်ကြားခဲ့သည်။ ထိုစဉ်က ရှမ်းသံတော်ဆင့် သတင်းဌာန (SHAN) ၏ ရှမ်းပြည်နယ်အတွင်း မူးယစ်ဆေးဝါးရောင်းဝယ်မှု စုံစမ်းစစ်ဆေးရေး အစီရင်ခံစာတွင် UWSA ခေါင်းဆောင် ပေါက်ယူချန်း၏ အငယ်ဆုံးညီဖြစ်သူ ပေါက်ယူဟွာသည် ၂၀၀၃ ခုနှစ် နိုဝင်ဘာလမှ ၂၀၀၄ ခုနှစ် ဖေဖော်ဝါရီလအထိ ထိုနေရာတွင် နေထိုင်ခဲ့ပြီး၊ UWSA ထံ အကြွေးမဆပ်နိုင်သည့် ယာဘ (Yaba) မူးယစ်ဆေးဝါးကုန်သည် ၁၁၃ ဦးကို ဖမ်းဆီးချုပ်နှောင် ထားခဲ့ကြောင်း ဖော်ပြခဲ့သည်။ ဤဝင်းကို ၁၉၉၇ ခုနှစ်တွင် ပြိုင်ဘက်များ၏ ပစ်ခတ်သတ်ဖြတ်ခြင်း ခံခဲ့ရသော မူးယစ်ရာဇာတစ်ဦးထံမှ UWSA က ဝယ်ယူခဲ့ခြင်းဖြစ်သည်။

၂၀၀၆ ခုနှစ်တွင် “ငါးကန်” ဝင်း၌ ကာစီနိုခန်းမနှစ်ခု၊ ကာရာအိုကေဘားတစ်ခုနှင့် မိုတယ်တစ်ခုရှိနေပြီဖြစ်ကြောင်း SHAN အစီရင်ခံစာတွင် ဖော်ပြထားသည်။ နှစ်ပေါင်း ၂၀ ကြာပြီးနောက်တွင် ထိုဝင်းအတွင်း အထပ်မြင့်အဆောက်အအုံများစွာကို တည်ဆောက်ခဲ့သည်။ ကိုသက်သည် ရောင်နီဦးဝင်းအတွင်းရှိ တရုတ်ငွေလိမ်ကုမ္ပဏီများစွာထဲမှ တစ်ခုတွင် အလုပ်လုပ်ခဲ့ခြင်းဖြစ်သည်။ အခြားသော မြန်မာလူငယ်များကဲ့သို့ပင် သူသည်လည်း ရရှိမည့်ဝင်ငွေ မြင့်မားမှုကြောင့် မိမိသဘောဆန္ဒအလျောက် အလုပ်ဝင်ခဲ့ခြင်းဖြစ်ပြီး၊ ကနဦးတွင် နှိပ်စက်ညှဉ်းပန်းခံရခြင်း မရှိခဲ့ပေ (လက်နက်ကိုင်လုံခြုံရေးများ စောင့်ကြပ်ထားသည့် ဝင်းအတွင်း၌သာ နေထိုင်အလုပ်လုပ်ရခြင်းမှလွဲ၍)။ သို့သော် ငွေအလွဲသုံးစားလုပ်သည်ဟု မတရားစွပ်စွဲခံရပြီးနောက်တွင်မှ သူသည် အခြားလူကုန်ကူးခံရသည့် ငွေလိမ်လုပ်သားများကဲ့သို့ပင် ပိတ်လှောင်ခံရခြင်း၊ ငွေလိမ်ဖုန်းများ အဓမ္မခေါ်ခိုင်းခြင်းနှင့် သတ်မှတ်ချက်မပြည့်မီပါက ရုပ်ပိုင်းဆိုင်ရာ အပြစ်ပေးခြင်း (သူ၏ဖြစ်ရပ်တွင် ထိုင်ထလုပ်ခိုင်းခြင်း) တို့ကိုခံခဲ့ရသည်။